NationGraph cartografa o sector público dos EUA coa API de Perplexity

O problema

Para as empresas que intentan venderlles ás axencias gobernamentais dos EUA, obter datos sobre os seus obxectivos é difícil. Aínda que os datos federais dos EUA adoitan estar centralizados, os sectores estatal, local e educativo son un labirinto administrativo. Con máis de 100.000 entidades independentes nas distintas administracións dos EUA, incluídos 12.000 distritos escolares, non existe unha estrutura de datos estandarizada.

Os clientes de NationGraph abranguen os sectores da educación, a seguridade pública, o transporte, a ciberseguridade e as TI, e as finanzas e a administración. A súa plataforma está deseñada para responsables de ingresos, executivos de contas e representantes de desenvolvemento de vendas que realizan investigacións, buscan desprazar a competidores ou validan orzamentos.

Antes de adoptar a API de Perplexity, NationGraph enfrontábase a tres desafíos clave:

• Fragmentación: cada concello aloxa as súas propias transcricións, orzamentos e actas de reunións en estruturas web distintas.
• Investigación: identificar detalles sinxelos, como o software ERP que usa unha cidade ou o tamaño da frota de vehículos local, requiría contratar ducias de colaboradores externos para realizar unha investigación manual a base de clics e inspección.
• Ferramentas limitadas: non existe unha infraestrutura real para analizar un condado ou un distrito escolar co mesmo nivel de detalle que usan os analistas de Wall Street para avaliar empresas cotizadas.

NationGraph necesitaba un motor de investigación capaz de buscar en internet a grande escala, verificar datos mediante citas e normalizar datos non estruturados para convertelos en fluxos de traballo aplicables.

A solución

Perplexity axuda a NationGraph a crear canalizacións de datos a partir dos datos de acceso público que publican as entidades gobernamentais. En concreto, NationGraph utiliza a API de busca e a API de Investigación profunda de Perplexity para ofrecer un motor de investigación aos seus clientes, o que converte Perplexity nun piar fundamental da infraestrutura de investigación de NationGraph. A diferenza dos LLM convencionais, que poden alucinar, perder o contexto ou proporcionar información desactualizada, Perplexity traballa co universo cartografado de entidades gobernamentais de NationGraph e impulsa o crecemento de clientes de NationGraph.

Así, cada usuario de NationGraph pode executar centos de consultas en paralelo con tecnoloxía de Perplexity para atopar a información específica que necesita.

Principais vantaxes técnicas:

• Investigación profunda: NationGraph usou as capacidades de investigación de Perplexity para equilibrar velocidade e custo. Mentres que outros modelos máis caros poderían tardar 20 minutos en elaborar un informe máis extenso, Perplexity ofreceu resultados de alta fidelidade 10 veces máis rápido, en dous ou tres minutos. Iso fixo que fose comercialmente viable para NationGraph integrar Perplexity, de xeito que os seus usuarios poidan utilizalo directamente no seu produto.
• Verificación de fontes: a capacidade de Perplexity para citar fontes gobernamentais específicas, como rexistros oficiais, documentos e actas de reunións, foi fundamental. Isto permitiulle a NationGraph manter un ciclo de retroalimentación para validar e manter a precisión dos seus resultados.
• Xestión da complexidade: Perplexity destacou á hora de navegar por sitios web gobernamentais paxinados e documentos non estruturados, extraendo detalles moi específicos que os clientes de NationGraph intentan comprender. Por exemplo, Perplexity permítelle a un cliente de NationGraph atopar os enderezos, os horarios de comidas e as normas de correo de todos os centros penitenciarios municipais.

Estas funcións déronlle a NationGraph a confianza necesaria para integrar Perplexity directamente no seu produto Workspace. Agora, os usuarios poden crear unha folla de cálculo con 300 institucións e executar en toda a lista unha consulta de Smart Column como “Quen é o actual director de TI e cales son as súas prioridades actuais en CMS (sistema de xestión de contidos)?”.

Un cliente de NationGraph quería identificar os distritos escolares que necesitaban axuda para transportar o seu alumnado á escola. Isto implicaba problemas co mantemento das frotas, as rutas e os horarios de entrada e saída, o cumprimento normativo e a resposta a incidentes, a comunicación coas familias, a contratación e retención de condutores cualificados ou mesmo gastos excesivos con provedores existentes. Perplexity axudou a NationGraph a realizar a investigación profunda necesaria para elaborar un conxunto de datos de alta calidade. “Era un problema que, sen ferramentas como Perplexity, nin sequera sabiamos como buscar”, afirma Eden Ding, CTO de NationGraph. “Teriamos que revisalo todo manualmente”.

O resultado

Ao delegar en Perplexity o traballo pesado da investigación a escala web, NationGraph pode ofrecer intelixencia sobre o sector público de forma máis rápida e económica.

En cifras

• Máis de 500.000 consultas: ata a data, NationGraph executou máis de medio millón de consultas de investigación con tecnoloxía de Perplexity.
• Máis de 350.000 Smart Columns: estas consultas impulsan as capas de investigación automatizada de NationGraph Workspace.
• 2 meses aforrados: integrar a infraestrutura de busca de Perplexity aforroulle ao equipo de enxeñaría aproximadamente os dous meses de desenvolvemento que lle levaría crear un axente web personalizado.
• De días a minutos: para un usuario final de NationGraph, investigar 300 institucións levaba días de clics manuais; agora leva menos de dous minutos.

Impacto estratéxico

Grazas á integración con Perplexity, NationGraph pode centrarse máis no seu produto. En lugar de manter a infraestrutura de investigación, os seus enxeñeiros céntranse en crear funcións de produto que axuden a provedores, axencias e cidadanía a interactuar cun sistema máis transparente. NationGraph e Perplexity converteron o que antes eran proxectos de datos “imposibles” en investigacións que se resolven nunha soa execución.

“Cando os nosos clientes fan unha busca, NationGraph achega os seus datos e Perplexity amplía a parte pública de cada consulta”, explica Eric. “O resultado final é que os clientes poden aforrar decenas de miles de dólares e meses de tempo con só un puñado de preguntas”.